Noor-e-Quran 36 Ibrahim (AS) se Badshah ki Kat Hujjati

Kya aap ne us ko nahi dekha jis ne Ibrahim se us ke Rabb ke bare mein is liye hujjat ki, ke Allah ne us ko saltanat di thi. Jab Ibrahim ne kaha, mera Rabb to woh hai jo zindagi deta hai aur maut deta hai. Us ne kaha, main bhi zindagi deta hoon aur maut deta hoon. Ibrahim ne kaha, be shak Allah suraj ko mashriq se nikalta hai, tu us ko maghrib se nikal de, to woh kafir hairan reh gaya. Aur Allah zalim logon ko hidayat nahi deta. (258) Ya jaise ke woh shakhs jis ka guzar ek aisi basti par hua jo apni chhaton ke oopar aundhi pari thi. Us ne kaha, Allah is ko is ki maut ke baad kaise zinda kare ga? To Allah ne us par sau saal ke liye maut tari kar di, phir us ko uthaya aur poocha, tum kitni der is haal mein rahe? Us ne kaha, main ek din ya din ka kuch hissa raha. Us ne farmaya, balkay tum sau saal tak rahe, ab tum apne khane peene ki cheezon ko dekho woh bilkul bhi kharab nahi hui hain, aur zara apne gadhe ko dekho aur takay hum tumhein logon ke liye nishani banain aur haddiyon ki taraf dekho, kaise hum un ka dhancha khara karte hain phir un par gosht charhate hain. Phir jab us par sab kuch wazeh ho gaya, to us ne kaha, main janta hoon ke be shak Allah har cheez par qudrat rakhne wala hai. (259) Aur jab Ibrahim ne kaha, ae mere Rabb! Mujhe dikha de ke Tu murdon ko kaise zinda kare ga? Us ne farmaya, kya tum is par iman nahi rakhte? Us ne kaha, kyun nahi? Lekin main chahta hoon ke mera dil mutma'in ho jaye. Us ne farmaya, tum parindon mein se koi char le lo aur un ko apne se maanoos kar lo phir har pahaar par un ka ek ek hissa rakh do, phir unhein bulao, woh tumhare paas dortey huey chale aayen ge. Aur jaan lo ke be shak Allah sab par ghalib hai, badi hikmat wala hai. (260)
Surah: Baqarah .... Ruku: 35 .... Aayat: 258- 260 .... Para: 3
Jo Allah par iman rakhta hai Woh us ko seedhi raah dikha deta hai aur us ko andheron se nikal kar roshni ki taraf le aata hai. Is ke bar’aks jo log Allah ke siwa dusron ko apna dost aur sarparast bana lete hain woh un ko seedhi raah se door karne aur ghata-top andheron mein gharq kar dene mein koi kasar utha nahi rakhte. Yahan is rukoo mein mazkoor teeno waqiaat is haqiqat ko behtareen tareeqe se wazeh karte hain.
Pehla waaqia us badshah ka hai jo taghoot ka parastar tha aur khud ko suraj devta ka avtar samajhta tha. Us ke andar itni taqat bhi nahi thi ke woh suraj ko apni marzi ke mutabiq poorab ke bajaye pachhim se nikal de magar woh khud ko kisi khuda se kam nahi samajhta tha. Us Namrood ne Ibrahim se Rabb ke bare mein behas ki aur buri tarah naakaam o pasheman hua.
Doosra waqia ek aise aadmi ka hai jis ne ek tabaah haal basti ko dekh kar yeh socha ke is bhayanak tabahi ke baad Allah is mein mar jaane walon ko kis tarah dobara zinda karega. Woh Allah ka ek nek banda tha. Yahan Quran mein us ka naam maujood nahi hai magar ain mumkin hai ke yeh Bani Israili Nabi Hizqeel ka waqia ho keh aisa hi ek waqia un se mutalliq Tauraat mein maujood hai. Allah ne us ko sau saal ki maut aur phir zindagi de kar aur us ke gadhe ko sukhe dhanchay se sahih salamat bana kar us par yeh haqiqat is tarah roshan kar di ke woh us ke liye haqqul yaqeen ka baais ban gaya.
Yahan aakhri waqia Ibrahim (A) ka hai jab unhone hayat baad maut ko samajhne ke liye Allah se hidayat o madad talab ki aur Allah ne un par bhi is haqiqat ko is tarah aashkaar kar diya ke un ko puri tarah itminan e qalb hasil hua aur un ko achi tarah maloom ho gaya ke Allah har cheez par poori tarah qudrat rakhne wala hai aur Us ke liye insanon ko un ki maut ke baad dobara paida karna koi mushkil kaam nahi hai.
By: Dr. N. Sabah Ismail (Nadvi Alig)
(5 May 2024)

Jibreel School | Islamic School in Kolkata | Muslim School in Kolkata | Muslim English Medium School in Kolkata | Islamic and Modern Education in Kolkata | Best Islamic School in Kolkata | Best Muslim School in Kolkata | Units of Jibreel International Islamic School | Muslim Private School in Kolkata | First Islamic School in Kolkata