Noor-e-Quran 15 Yahood Aur Nasara Ka Ikhtilaf

 

Aur Yahood ne kaha ke Nasara ki koi bunyad nahi hai aur Nasara ne kaha ke Yahood ki koi bunyad nahi hai aur woh sab kitab ki tilawat karte hain. Isi tarah un logon ne bhi kaha jin ke paas ilm nahi hai. Toh Allah hi Qiyamat ke din is baat ka faisla karega jis mein ye ikhtilaf kar rahe hain. (113) Aur us se bada zalim kon hai jo Allah ki masjidon ko is se roke ke wahan Allah ka zikr kiya jaye aur un ko viran karne ki koshish kare. Aise logon ko ye haq nahi pahunchta ke woh un mein daakhil hon magar darte huye. Un ke liye duniya mein ruswai hai aur akhirat mein bahut bada azab hai. (114) Aur Allah hi ka hai mashriq bhi aur maghrib bhi. Lehaza tum jis taraf rukh karoge to wahin Allah ki zaat hai, be shak Allah badi wus’at wala, ilm wala hai. (115) Aur unhon ne kaha ke Allah ne kisi ko beta bana liya hai. Woh is se paak hai balkay asmanon aur zameen mein jo kuch hai Usi ka hai. Sab ke sab Us ke farmanbardar hain. (116) Woh asmanon aur zameen ko wujood mein lane wala hai aur jab woh kisi amr ka faisla kar leta hai toh bus itna farmata hai ke ho ja to woh ho jata hai. (117) Aur jo log ilm nahi rakhte unhon ne kaha ke Allah hum se kalam kyun nahi karta ya hamare paas koi nishani kyun nahi aati? Isi tarah un se pehle jo log guzre hain unhon ne bhi inhi ki si baat kahi. In sab ke dil ek hi jaise ho gaye. Yaqinan hum ne aayatien saaf saaf bayan kar di hain un logon ke liye jo yaqeen karne wale hain. (118) Be shak hum ne tumhein haq ke sath bheja hai, khush khabri sunane wala aur darane wala bana kar, aur tum se dozakh mein jane walon ke bare mein koi sawal nahi kiya jaayega. (119) Na Yahood tum se raazi hone wale hain aur na Nasara yahan tak ke tum inhi ki millat ka itba' karne wale na ban jao. Tum keh do ke Allah ki hidayat hi asal hidayat hai. Aur agar tum ne is ilm ke baad jo tumhare paas aa chuka hai in ki khwahishon ki pairwi ki to Allah ke muqablah mein na tumhara koi dost hoga aur na koi madadgar. (120) Jin logon ko hum ne kitab di hai woh is ki aise tilawat karte hain jaisa ke is ki tilawat karne ka haq hai, yehi log is par iman late hain aur jo is ke sath kufr ka rawaiya ikhtiyar karein ge to wohi log asal mein nuqsan uthane wale hain. (121)

.... Surah: Baqarah .... Ruku: 14 .... Ayat: 113- 121 ....

Yahood aur Nasara dono Bani Israeel ki mazhabi jamaten hain. Ye dono Muslim dushmani mein ek sath khadi nazar aati hain magar aapas mein ye dono muttahid wa muttafiq nahi hain. Ye dono ek dusre ke khilaf barsar e pekar rahti hain aur ek dusre ke khilaf ye ilzam lagati hain ke in ki apni koi bunyad nahi hai. In donon ke paas Allah ki kitab hai lekin jin ke paas koi aasmani kitab nahi aur jin ki dar-haqiqat koi bunyad nahi hai woh bhi dusri jamaton ko be-bunyad aur na-haq qarar deti hain aur apne bare mein ye dawa karti hain ke bus wohi haq par hain aur sirf inhi ka khaliq e kainat se rishta wa taalluq hai. In baton ka faisla is duniya mein mumkin nahi hai. Is ka faisla toh ab Qiyamat ke din hi hoga.

Ye tamam log khuda ke bare mein ajeeb ajeeb batein banate hain aur aisi batein karte hain jin ka haqiqat se koi taalluq nahi hai. Ye ifham wa tafheem ki jitni batein karte hain sab dikhawa hai, asal mein ye chahte hain ke tum bhi apna mazhab chhor kar in ke jaise ban jao. Allah ne apne aakhri Nabi Muhammad Arabi ﷺ ko basheer wa nazeer bana kar bhej diya hai aur un ko aisi kitab ata kardi hai jo insanon ki hidayat ke liye kaafi hai. Emaan walon ko ye zeib nahi deta ke woh Allah wa Rasoolؐ ka rasta chhorr kar dusron ka rasta ikhtiyar karein. Agar woh aisa karein ge to Allah ke muqablah mein un ka na koi dost hoga aur na koi madadgar."

By: Dr. Noorus Sabah Ismail (Nadwi Alig)
(26 November 2023)