Keh do ke jo Jibreel ka dushman hai to woh jaan le ke us ne is kalam ko tumhare dil par Allah ke hukm se utara hai, yeh tasdeeq karne wala hai us ka jo us ke pehle se mojud hai aur yeh hidayat o basharat hai eeman walon ke liye. (97) Jo koi Allah ka, Us ke farishton ka, Us ke rasoolon ka, aur Jibreel aur Mikal ka dushman hai to be shak Allah aise kafiron ka dushman hai. (98) Aur yaqeenan hum ne tumhare oopar nihayat wazeh ayaat nazil ki hain, aur un ka inkar sirf fasiq log hi kar sakte hain. (99) Kya aisa nahi hai ke jab kabhi unhon ne koi ahad kiya to un ke ek group ne us ko tod dala balki un me se aksar eeman hi nahi laate. (100) Aur jab un ke paas Allah ki taraf se ek rasool aya jo us cheez ki tasdeeq karne wala hai jo un ke paas mojud hai to un me se ek group ne jin ko kitab di gayi thi, Allah ki kitab ko is tarah peeth peeche phenk diya, goya woh is ko jante hi nahi. (101) Aur woh un cheezon ke peeche par gaye jo Suleman ke ahd e hukumat me shayateen padhte the. Halankeh Suleman ne koi kufr nahi kiya balki yeh shayateen the jinhon ne kufr kiya. Yehi logon ko jadoo sikhate the. Aur woh us cheez me par gaye jo Babil me do farishton Haroot o Maroot par utari gayi thi halankeh woh jab bhi kisi ko apna fun sikhate to us ko khabardaar kar dete the ke hum aazmaish ke liye hain to tum kufr me nahi par jana. Magar yeh log un se woh ilm seekhte jis se shohar aur us ki biwi me judai dal sakte hain. Aur dar’asal woh is ke zariye Allah ki marzi ke baghair kisi ko nuqsan nahi pahuncha sakte the. Aur yeh woh cheez seekhte the jo un ko nuqsan pahunchaye aur nafa nahi de. Aur woh khoob jante the ke jis ne is ko khareeda us ke liye akhirat me koi hissa nahi hai. Kya hi buri hai woh cheez jis ke badle me unhon ne apni jaanon ko becha. Kash unhen maloom hota! (102) Aur agar woh eeman laate aur taqwa ikhtiyar karte to Allah ki janib se un ko behtareen sawab milta, kash unhen maloom hota! (103)
.... Surah: Baqarah .... Ruku: 12 .... Ayat: 97- 103 ....
Bani Israel ki imani, akhlaqi, samaji, muashrati aur ruhani bimariyon ka zikr chal raha hai. Allah ne un par be tahasha fazl o inaam farmaya aur bohot sare nabiyo ko un ki hidayat o rehnumai ke liye un ke darmiyan bheja magar woh apni bad-akhlaqiyon aur bad-aamaliyon me itne aage barh gaye ke unhon ne Allah ki nihayat aham aur muqarrab makhlooq farishton ki mukhalifat bhi shuru kar di. Un ke paas mojud aasmani kitabon aur un ke darmiyan aane wale nabiyo ne un ko farishton ki ahmiyat ke talluq se bohot kuch bata diya tha aur Jibreel o Mikal jaise muazaz o muqarrab farishton ki azmat o jalalat se bhi aagah kar diya tha lekin is ke bawajood unhon ne sirf is liye Jibreel Ameen ke talluq se na-zeba baatein phailani shuru kar di ke woh Muhammad Rasool Allahﷺ ke paas Allah ka kalam le kar aa rahe the. Unhon ne yeh socha ke is tarah Jibreel ki azmat o ahmiyat kam ho jaye gi aur log Quran aur Muhammadﷺ se door ho jayenge. Unhon ne logon ko samjhana shuru kiya ke Mikal to bohot aham farishta hain magar Jibreel koi aham farishta nahi hain. Yahan Allah Ta'ala ne unka sakht muhasabah kiya hai aur saaf lafzon me yeh elan kar diya hai ke jo bhi Jibreel o Mikal aur digar farishton se dushmani rakhta hai to Allah khud aise kafiron ka dushman hai.
Yahan Mulk-e-Suleman (A) aur zamanah Babil ka zikr bhi hua hai. Allah Ta'ala ne Suleman (A) ko jadooi hukumat ata farmayi thi. Un ke mukhalifon ko jab kuch na soojha to unhon ne sehar o sahiri ka bazaar garam kar diya aur khud Sulemani hukumat ko bhi jadugari ka mojiza o karishma qarar dene lage. Is zamanah me sehar, shuabda, faal, nujoom aur kahanat jaisi cheezon ko khoob urooj haasil hua. Phir jab Allah ne jadugaron ki shararat se hifazat ke liye Babil me do farishton Haroot o Maroot ko ek aise ilm ke saath utara jo ashiya o kalimat ke roohani khawas o asraat wali cheezon ganda taweez aur jhaar phoonk jaisa kuch tha aur jo khula hua fitna aur imtehan tha, to is ka bhi unhon ne sirf ghalat aur najayez istemal kiya aur farishton ke samjhaney ke bawajood is se faida uthane aur faida pahunchane ke bajaye sirf aur sirf nuqsan kamaya.
By: Dr. Sabah Ismail Nadwi Alig
(12th November 2023)
No comments:
Post a Comment